Kuqhamuke ukulwisana phakathi kwabantu abathengisela erenkini lamapholisa koBulawayo ngoLwesine ngemva kokuba amapholisa kamanisipala eqalise ukugijimisana abantu laba ebathathela impahla zabo.
Imbiko esiyamukeleyo ithi ukubotshwa kwabanye babantu laba kucunule abanye babo baqalisa ukulwisana lamapholisa ekhansili kwacina sokubizwa amapholisa abona ngokulondoloza ukuthula aweRiot.
Isehlakalo lesi siza ngesikhathi ugatsha lweZimbabwe Revenue Authority (ZIMRA) luphakathi kokuhlasela abathengisa ezitaladeni labantu abazisebenzayo lusithi kumele bahlawule imithelo.
Izisebenzi zalolugatsha zibikwa bezibhoda endaweni ezitshiyeneyo ezigoqela amaFlee Market eKariba zitshela abantu abathengisa emkambo ukuthi kumele babhalise bahlawule imithelo, okuyinto esolwa kakhulu ngabanengi.
Unobhala jikelele weZCTU uMnu Japhet Moyo lesiphathamandla senhlanganiso emela abazisebenzayo iZimbabwe Chamber of Informal Economy Association, uNkosazana Debra Mukasa basole kakhulu okwenziwa yiZIMRA.
