amalinks wokungena

Breaking News

IJSC Isungula Umkhankaso Wokwakha Imithethwandaba Eminengi Elizweni


Uhlangothi lukahulumende olukhangela ukuthethwa kwamacala, iJudicial Service Commission solwethule indawo ezintathu eBinga, Nkayi le Victoria Falls zokuthi kwakhiwe imithethwandaba emitsha, isekelwa nguhulumende we Denmark, ukuze ukuthethwa kwamacala kuqhutshwe ngemfanelo langokuphangisa.

IJSC isemkhankasweni wokwakha imithethwandaba engamatshumi amathathu elizweni lonke jikelele ezabe isenelisa njalo ukuthetha amacala abantwana ama-Victim Friendly Courts.

Umantshi omkhulu kusigaba seMatabeleland North uMnumzana Enias Magate uthi imithethwandaba le izanceda ukuthi kube labomantshi abanengi kulezizigaba okuzakwenza amacala athethwe ngokuphangisa.

Lanxa abadala besithi icala kaliboli, inengi kulezizindawo beselicabanga ukuthi akulalutho olwenziwayo njengoba abantu abalamacala bebebabona belokhu bezibhodela kungani akulalutho abalwenzayo. Uthi kuhle njalo ngoba amacala adinga i-Victim Friendly Court ebethethwa koBulawayo okade kusenza kube nzima ukuthi abafakazi bafinyelele khona.

UNkosikazi Precious Ndlovu osebenzelana labesifazana abadlwanguliweyo, uthi inengi labantu elidlwanguliweyo belihamba imimango emide ukuze liyethola uncedo njalo imithethwandaba eminengi ibivele ingayakhwanga ngendlela evumela abadlwanguliweyo ukuthi baphe ubufakazi bengakhangelananga lalabo ababadlwangulileyo okwenza bazwe ubuhlungu ngamandla abanye baze bakhethe ukutshiyana lodaba lwakhona. Uthi ukuvulwa kwemithemthwandaba le kuzaphathisa ukugcwalisa izibopho zokusa umthetho ebantwini ukuze amacala aphange ukuzwiwa ngomantshi.

UNkosikazi Magugu Nkolomi, oyisakhamuzi, uthi amaVictim Friendly Courts yindlela enhle yokuthi abesifazana labantwana bathole usizo ngoba indaba yonakala emapholiseni angelasineke sokukhulumisana labantu abadlwanguliweyo nxa bethe bayadinga uncedo. Uthi esikhathini esinengi basuka babuzwe imbuzo enzima phakathi kukazulu okusuka kubafake ihlazo, kubazwise ubuhlungu ngamandla kodwa lokhu kulakho ukuphela ngoba amapholisa asebenza kuvictim friendly unit ayafundiswa ukuthi aphathe njani abantu.

UNkosikazi Ndlovu, uthi imithethwandaba eseduze eyakhwe ngendlela izenza amacala athethwe eduzane kuthi lezakhamizi zibekwazi ukuthi icala elithile eladalwa endaweni yabo limiswe phambi kukamantshi lokuthi impumela yiphi. Uthi kwesinye isikhathi amacala ayabe ethethwe khatshana kuthi lanxa ummangalelwa efumanwe engelacala izakhamizi zisale zingasuthisekanga ngoba zingabonanga ukuqhutshwa kodaba lwakhe.

IJSC, ngaphansi kohlelo lolu lohulumende weDenmark, seyayakha imithethwandaba emitsha eGuruve, eMutoko,eMurewa, eNorton kanye le Esigodini. Ngemva kokwakha eNkayi, eBInga leVictoria Falls kukhangelelwe ukuthi umsebenzi ofanayo uqale eLupane.

XS
SM
MD
LG