Abakhankasela ukulinganiswa kwamathuba ekulotshweni kwezindaba bakhala ngokwenza kwentathelizindaba ngesikhathi ziloba phezu kwabesifazane abaphatheke kwezombusazwe, bezethesa umlandu wokuloba ngendlela elobandlululo. Abezindaba bakhuthazwa ukuphatha ngokufanayo abesilisa loba abesifazane ekulobeni, okuzaphathisa ukuguqula imibono kazulu empini yokuqeda indlela bakhangelwa ngayo abesifazane laba.
Abakhankasela ilungelo lowesifazana bathi ngesikhathi esinengi okuphuma ezindabeni ngowesifazana kuvame ukuba ngokubi kuphela. Lokhu kuphume emhlanganweni lentathelizindaba ngoLwesibili, owenzelwe eQuill Club lapho okuhlangana khona intathelizindaba, eweteleni ye New Ambassador Hotel eHarare.
Enye yengcwethi kwezokuthapha izindaba njalo engumcebesi kuhlangothi lokulinganiswa kwamathuba phakathi kwabesilisa labesifazane, unkosikazi Simbiso Marimbe ukhuthaza intathelizindaba ebezikulomhlangano,oqoqwe ngabenhlanganiso yentathelizindaba zesifazane eye Federation Of African Media Women – FAMWZ, ukuba ziboloba ngendlela eyehlisa isimo sowesifazane, kuphakamisa esabesilisa kuphela.
Wakhuthaza njalo u Marimbe ukuba abahleli bezindaba ukuba babe lendlela yokukhuthaza ukulinganiswa kwamathuba ekulotshweni kwezindaba.
Lokhu kusekelwe ngunkosazana Tendayi Garwe, obona ngezokuhlelwa kwenhlelo enhlanganiseni ye Women in Politics.
UGarwe uthi asebekunanzelele njengenhlanganiso yikuba kabuvezwa ubuciko lokuzinikela kwabesifazane lanxa ubufakazi bukhona okusuka kwenze zingaphathwa lokuqakathekiswa okufanayo indaba eziphezu kwabo. Uthi udubo lwendlela intathelizindaba eziloba ngayo nxa kuphezu kowesifazane, lusukela kundlela ezimbuza ngayo okusuka kwenze esabe ukukhulumisana lazo, aphe laye imibono yakhe ekhululekile njengalokho okwenziwa ngowesilisa.
Uthi abezindaba balomsebenzi omkhulu wokwenza uzulu abone isimo sezinto ngelihlo elithuthukisa isizwe ngokuloba phezu kokwenzakalayo lokuthola imibono kuye wonke umuntu kungakhathalekile ukuba ngowesifazane loba owesilisa.
Umnumzana Trinity Matendere ungomunye wentathelizindaba eloba izimele njalo isanda kuphutsha izifundo zayo zokuthapha izindaba,obekulomhlangano laye. Uthi u Matendere kuyadanisa ukuba lokhe bebandlululwa abesifazane laba ngendlela izindaba eziphezu kwabo zilotshwa ngayo okufana lokubabeka njengabantu abangalesimilo kakhulukazi kundaba zezemacansini njalo benganelisi ukuphatha imisebenzi yentuthuko.
Wengeze wathi lesi simo senza owesifazane esabele katshana lapho ecelwa ukuba aphe imibono yakhe kundaba ezehlukeneyo lapho idingwa zintathelizindaba ngesikhathi ziloba indaba.
Udubo kungasi lwentathelizindaba kuphela kodwa lusukela emakolitshini lapho bafundela khona umsebenzi wabo u Matendere athi kumele zibe banzi izifundo hatshi ukugxila kudaba lokulotshwa kwendaba kuphela njengalokho okuyikho khona okwamanje.
Intathelizindaba bezikhuzunjwa njalo phezu kokuqakathekha ukwazi phezu kwezivumelwano ezenziwa ngohulumende umhlaba wonke emikhankasweni ephezu kokulinganiswa kwamathuba phakathi kwabesifazane labesilisa, kubonakale lalapho ziloba indaba intathelizindaba ngokutholisa inhlangothi zonke amathuba wokupha imibono edabeni oluyabe lusegudwini ngaleso sikhathi.
Lezingcwethi kwezezindaba labaphatheke kumikhankaso yokulinganiswa kwamathuba phakathi kwabesilisa labesifazane ebezikulomhlangano zithi bafisa ukuba ilizwe lifike kusimo sokuba abahleli, kabazemukeli indaba ezilotshwa ngendlela engavezi imibono yabesifazane.