Izakhamizi kanye lengcwethi ekuhlalisaneni kukazulu koBulawayo zithi uMthwakazi udiniwe ngenkokheli ekhuluma nje ingalethi nguquko.
Lokhu kuphume ngemva kwemihlangano kamsekeli kaMongameli welizwe uMnumzana Phelekezela Mphoko, ngempelaviki, othi kudingeka ukuthi amandla anikwe izabelo, amakhansili abelelungelo lokusebenzisa imali ingalawulwa zinhlangothi zaphandle kanye lokuziphathela inhlelo zamanzi lamagetsi ukuze idolobho lakoBulawayo livuselelwe lamankampani avule njalo.
Imihlangano kamsekeli kamongameli iphathwe emahofisini ebandla le Zanu PF eDavies Hall koBulawayo kanye lasemalokitshini ahlala abanengi eMagwegwe, Nkulumane le Mpopoma.
UMphoko ubethi uzobonga uBulawayo onguye owamkhetha kuCentral Committee njalo akhulumisane lozulu wonke ukuthi akazukwenelisa ukwenza umsebenzi wakhe nxa engatholanga usekelo lukazulu.
Ukukhethwa kukaMphoko ukuba ngumsekeli kamongameli welizwe kuze phakathi kokudonselana ebandleni leZanu PF kuthi uzulu laye esithi kamazi ukuthi uvele ungubani.
Ekhuluma emihlanganweni le, uMphoko uphathaphathe indaba ezitshiyeneyo ezigoqela ukuvalwa kwamafekithali, ukusilela kwemisebenzi kanye lembali yakhe kwezombusazwe.
Ekhuluma ngamafekithali akoBulawayo asekhala imbungayezi njengonxiwa lukaHa lona olungamili lambuya, uthi yena wazi ukuthi ikhansili kumele ibe lamandla phezu kwamadamu ayo, amandla kagetsi kanye lemali yomthelo wezimota hatshi lokhu osokusenziwa ukuthi imali iqale ithathwe isiwe kunhlangothi ezitshiyeneyo eziyizo ezikhangelelwe ukuthuthukisa idolobho. Uthi loludubo lwengezwa zinkokheli ezivela kulumhlubulo welizwe ezingelathando labantu.
Uqhubeke esithi ukungabiwa kwamandla yikho okwenza amanzi asilele, amagetsi angahanjiswa ngendlela kuthi lemigwaqo ingalungiswa.
Ingcwethi kwezokubuswa kwelizwe njalo eyisakhamuzi, uDokotela Samukele Hadebe, uthi udaba lokwabiwa kwamandla kuzabelo lukusisekelo sombuso kodwa uhulumende ukhanya engajahanga ukugcwalisa izifiso zabantu zokusa amandla okubusa ezabelweni.
Uthi sebekhangelele ukuthi inkokheli ezisekela lelinyathelo zikhulumisane lomongameli labanye abaphathintambo ukuthi indlela yentuthuko yiyo le yokwaba amandla okuthatha izinqumo kubomanisipala lakuzabelo ukuze kubekwe imithetho ezakhuthaza lokhu.
Wengeze esithi kulokwesaba kuleli ukuthi ukwaba amandla kuzaxega izabelo, ilizwe liqunywaqunywe kodwa okwakhathesi ilizwe livele alibambananga ngoba ezinye izabelo zibona zikhangelelwa emanzini kulezinye.
Umsekeli kamongameli uthi uzabiza umhlangano lekhansili yakoBulawayo kanye labake baba ngomeya labomabhalane bedolobho ukuze babonisane ukuthi idolobho lingathuthukiswa njani.
Owake waba ngumabhalane wedolobho, uMnuzana Moffat Ndlovu, uthi inkokheli ekhona kumele ikhohlwe ngamabandla ezombusazwe iqakathekise okulungele idolobho. Uthi kusukela kudala, lelidolobho belivele liqakathekisa umsebenzi hatshi ezamabandla ombusazwe okokuthi khathesi uhulumende angasebenzelana kuhle ledolobho kungakhathalekile ukuthi ikhansili imelwa ngokhansili abavela kuliphi ibandla kube lentuthuko.
UVP Mphoko uphathe njalo udaba lwamahungahunga athi yena wayesebenzela inhlanganiso ye Central Intelligence Organisation ngesikhathi seGukurahundi esithi lokhu akusiqiniso. Uthi wangena kuhlangothi lolu ngomnyaka ka 1987 ngemva kokukhululwa kwakhe entolongweni ayevalelwe khona ngesikhathi lesi ethi yena kalagazi lomuntu kwezakhe izandla.
Ingcwethi kwezokuhlalisana kwabantu njalo engumfundisi, uRev Useni Sibanda, ukhulume ngodaba lolu ethi ukuthi ngubani owayengaphi ngesikhathi lesi akusizi isizwe kodwa okudingekayo yikuthi kuyini okwenziwayo okubambekayo okuzakhuthaza isizwe ukuthi sikhumisane umlotha, amanxeba ayizolo alokhu esabhibhidla athole ukwelatshwa.
Uthi khona ukukhuluma kulula ngoba vele umlomo kawugcwalelwa mfula kodwa njengomphathintambo wogatsha lokukhumisana umlotha kuyini akwenzayo uMnumzana Mphoko ukuqeda inzondano eseyalethwa yisehlakalo seGukurahundi okwenza lalamhla ngemva kweminyaka yonke le abone kuqakathekile ukuthi azigeze izandla ukuthi kazange abeyingxenye yalumsebenzi wokuchitha igazi.
Act 5// Sibanda
Text// Lanxa nje imihlangano le ibibizwe kuthiwa ngeyezakhamizi zonke nje, inengi lesabele khatshana licabanga ukuthi ngeyabasekeli bebandla leli kuphela, Abasekeli labo bakhanya bebecabanga ukuthi yimihlangano yabo njengoba beze begqoke izembatho zebandla njalo kuhlatshelwa zona ingoma zakhona.
UVP Mphoko ukhanya ezaba ngummeli okhulumisana lezakhamizi njalonje ngoba ethembisa ukuphenduka azo khulumisana labaphethe labake baphatha ikhansili ukuze kudingwe amacebo okuthuthukisa idolobho.