Idolobho leKwekwe belisosizini olukhulu ngoLwesihlanu kulandela ukufa kwabantu abalitshumi lanye ngemva kokunyathelana okube khona ngemva komthandazo wenkonzo kaMnu Walter Magaya eyeProphetic Healing and Deliverance Ministries.
Umthandazo lo ungenwe zinkulungwane lenkulungwane zabantu enkundleni yeMbizo ngoLwesine njalo ukunyathelana lokhu kuqhamuke umthandazo usuphelile.
Ekhuluma lentatheli eKwekwe, uMagaya uthe uzaphathisa imuli inye ngayinye ebhujelweyo ngemali engange $1,000 ezancedisa ekungcwabeni abafi.
Abanye bathi amapholisa yiwo abangele ukunyathelana lokhu ngokuqala ukutshaya abantu, kodwa abanye bathi kabangeke basole amapholisa.
Isiphathamandla samapholisa uAssistant Inspector Mahoko walile ukukhuluma ngaloludaba.
Omunye wabafileyo nguntombazana oleminyaka elitshumi lasithupha uRachel Zvinei.
Imuli yakhe ithi okubadabula kakhulu inhliziyo yikuthi unina laye ulaliswe esibhedlela ngemva kokubhujelwa ngomunye umntwana ngesikhathi ebeletha kumalanga edluleyo.
Sixhume isakhamuzi seKwekwe uThulani Sibanda othi liphakathi kokukhala okukhulu elidolobho.
