Abaquba umsebenzi wokuthwala abantu phakathi kwedolobha le Harare lako Bulawayo bakhala ngokuthi babhekana lenkinga emsebenzini wabo kubangelwa yikuthathwa kwesikhathi eside kulungiswa umgwaqo omkhulu ohlanganisa amadolobha ababili la.
Umnumzana Moses Nyakudya othwala abantu pakathi kwedolobho le Harare lelako Bulawayo uthi amakhombi akhe sesebenzisa umgwaqo odlula eMvuma usiya ko Bulawayo kulokulandela umgwaqo odlula eNorton ngenxa yalumsebenzi ongapheliyo ethi ucina engesenelisi ukuthwala abanye abantu abaya endaweni ezifana le Chegutu, Kadoma le Kwekwe.
Umtshayeli wamabhasi aya ko Bulawayo eMbare musika okhethe ukubizwa ngokuthi nguLovemore kuphela, uthi inkinga okwamanje iphakathi kwe Kadoma le Gweru:
Omunye njalo umtshayeli umnumzana Sam Mapfumo uthi umsebenzi lo ubenza ukuba bangene lasemigwaqweni edlula emizini ehlala inengi ikakhulu edolobheni le Kadoma. Uthi izimota ezinengi sezikhetha ukusebenzisa umgwaqo we Mvuma ngenhloso yokwenqabela ukuphazamiswa kunhambo zabo ngoba umgwaqo lo ufanana nje lomango womgwaqo odlula e Chegutu le Kadoma:
Uqhubeke ethi noma lokhu kungaba lula ezimoteni ezincane ezifana lama Kombi kuba nzima kwabamabhasi ngoba ukusebenzisa umgwaqo we Mvuma kungabenza ukuba belahlekelwe ngama customer atholakala kuzilindo zama bhasi emadolobheni afana le Chegutu, Kadoma le Kwekwe.
Ugatsha lokuthwalwa kwabantu lezinto kuhulumende luthi lumsebenzi uhamba kakuhle njalo ukhangelelwa ukuphela ngesikhathi esibekiweyo. Ngakhoke lukhuthaza abatshayeli ukuba betshayele ngonanzelelo olukhulu belandela iziqondiso langesiqubu esibekiweyo emgwaqweni lo okwamanje usalungiswa njalo bavulele indlela izimota eziquba lumsebenzi kuqala.
Uhulumende we Zimbabwe uphakathi komsebenzi omkhulu wokulungisisa njalo umgwaqo ovela eMutare usiya ePlumtree osokusibanga sokuba usungena laphakathi kwamadolobha athile. Umsebenzi lo ukhangelelwa ukuphela phakathi kwenyanga ezimbili ezilandelayo.