Inhlanganiso ezimeleyo eye Zimbabwe Democracy Institute ithi inhlolisiso esanda kuyenza ngohlelo lwe Zimbabwe Agenda for Social and Economic Transformation – iZIMASSET - iveza ukuba abantu abanengi esabelweni seMashonaland West kabala lwazi ngohlelo lolu.
Umqondisi weZimbabwe Democracy Institute, uMnu. Pedzisayi Ruhanya, uthi abantu abethule imbono yabo kunhlolisiso le bedlula amakhulu ayisitshiyangalo mbili lamatshumi ayisithupha – 856.
Abedlula amakhulu amane lamatshumi ayisikhombisa – 472 bathe kabazi lutho ngohlelo lolu. Abanye babo bathe sebezwe ngalo kodwa kabazi lutho ngokuthi lwenzani.
URuhanya uthe inhlolisiso le iphinde yaveza ukuthi abantu abazi kancane ngalo ngabesilisa. Kodwa-ke inengi labantu abangene kunhlolisiso le bathi kabakaze babale ugwalo lweZIMASSET olulenhloso yokuthuthukisa umnotho welizwe okweminyaka eminhlanu elandelayo.
URuhanya uthi kumele iziphathamandla zikahulumende zixoxisane lozulu nxa zifuna ukuthi uhlelo lolu luphumelele.
Kubikwa kudingakala amabillion angamatshumi amabili lesikhombisa amadollar eMelika – $27 billion yokuthi uhlelo lolu lwenziwe ngemfanelo eZimbabwe.
Iziphathamandla zelizwe zithi okwamanje ilizwe kalilamali yokuqhuba uhlelo lolu ngemfanelo.
Ukuze sihlaziye udaba lolu, uGibbs Dube oweStudio 7 uxoxe loMnu. Thabang Nare okunhlanganiso ezimele yodwa eyeZimbabwe Chamber of Informal Economy Association.