Abatsha abaphatheke kuhlelo lukaMongameli Obama weleMelika olwe Young African Leaders Initiative-YALI, nyakenye lalonyaka, bathi lubaphathisile lwabapha idlabuzane lokuthi bakhokhele labo ngokugcweleyo, ekuqhubeni inhlelo zentuthuko, ezizaphathisa uzulu weZimbabwe.
Bathi loluhambo lweMelika lubavule amehlo, lwabenza bazimisele ukusebenzela ilizwe kanye lokuphathisa ekuthini uzulu aguqule indlela acabanga ngayo ngemisebenzi yentuthuko.
Unkosazana Sizwile Nyamande wase Victoria Falls ngomunye wabathole ithuba lokuyaphatheka kuloluhlelo okwamaviki ayisithupha ese Arizona State University.
Wengeza uNyamande, ethi uphathiseke kakhulu ngokuthola ulwazi oluzamenza anelise ukukhokhela inhlelo zentuthuthuko.
Unkosazana Nyamande vele ungumkhokheli enhlangabisweni ezehlukeneyo ezigoqela iqembu lokulondolozwa kwemvelo ele Environment Africa e Victoria Falls, iqula lezokuthuthukiswa kwezemfundo, i- Hwange Education Stakeholders Steering Committee kanye lohlangothi lokuletha inguquko kwezemfundo olwe Betters Schools Program-Victoria Falls Cluster.
Umnumzana Promise Simwinde Muleya,wase Kaliangwe, eBinga uye eMelika phansi kohlelo lweYALI lolu lwamusa eUniversity of California e Beckley.
Uyaluncoma loluhlelo uMuleya, ethi luzamphathisa emsebenzini wakhe avele ewuqhuba phansi kwe Promise Foundation Austria, lokuphathisa abaswelayo ehlangothini lwezemfundo esigabeni sakhe.
Uthi ufisa ukusebenzelana lozulu ukuze azwisise ukuqakatheka kokuhlanganela ndawonye endabeni zentuthuko njengalokho akubone ese Melika.
Uhlelo lwe YALI lolu lwasungulwa ngenjongo yokuphathisa abasakhulayo bemazweni aweAfrica, ukuze bathole imfundiso yokuba zinkokheli, okuzaphathisa ekuthini abasembusweni bazi ukuqhuba imisebenzi yabo ngendlela.